Meistaramánuður Logo

1. til 31. október 2015

Hvað er Meistaramánuður?

Meistaramánuður fer fram ár hvert í október. Í Meistaramánuði skora þátttakendur sjálfa sig á hólm og setja sér markmið. Markmiðin geta verið stór og smá en í gegnum árin hafa þáttakendur til að mynda sett sér markmið um að heimsækja ömmu og afa oftar, taka mataræðið í gegn, lesa fleiri bækur, klífa fjöll, mála myndir og fara fyrr á fætur en aðra daga.

Rannsóknir sýna að það tekur mann að minnsta kosti 30 daga að koma upp nýjum venjum. Að gera það í hóp með öðrum gerir það svo bæði skemmtilegra og auðveldara. Þessvegna er Meistaramánuður tilvalinn til þess að fara aðeins út fyrir þægindarammann, prófa eitthvað nýtt eða gera það sem þig hefur alltaf langað til að prófa.

Allir geta verið með í Meistaramánuði. Eina skilyrðið er að fólk setji sér markmið. Þú setur reglurnar - þetta er þinn Meistaramánuður. Þú getur skráð þig til leiks hér til hliðar og við hvetjum þig til þess að nota kassmerkið #meistaram.

Spurt og svarað

Hvað þarf ég að gera til þess að taka þátt í Meistaramánuði?

Í raun þarftu ekkert nema viljann og metnaðinn til að setja þér markmið fyrir einn mánuð og standa við þau. Við mælum með því að þú skráir þig til leiks á www.meistaramanudur.is og fáir sem flesta vini, fjölskyldumeðlimi og vinnufélaga til að taka þátt með þér. Svo þarftu bara að skrifa markmiðin niður. Þegar nær dregur Meistaramánuði sendum við út dagatal sem þú getur skrifað markmiðin á.

Er þetta ekki bara enn eitt átakið eins og áramótaátakið sem ég stend aldrei við?

Meistaramánuðurinn á ekki að vera átak, heldur upphafið á breytingu lífs þíns til hins betra. Meistaramánuðurinn snýst ekki bara um að taka vel á því í ræktinni eða taka til í mataræðinu heldur líka litlu hlutina eins og að eyða meiri tíma með fjölskyldunni eða lesa loksins bókina sem þú ætlaðir þér alltaf að lesa. Notum tækifærið og lítum í eigin barm, er ekki eitthvað sem við megum bæta í okkar fari? Er ekki einhver áskorun sem okkur langar að sigrast á í eitt skipti fyrir öll?

Þarf ég að skrá mig einhversstaðar?

Við hvetjum fólk til þess að líka við facebook síðu Meistaramánaðarins til þess að fá reglulega hvatningu ásamt því að skrá sig á www.meistaramanudur.is.

En ég lifi eins og meistari alla daga, af hverju ætti ég að breyta því?

Til hamingju með að vera með góða stjórn á lífi þínu. Sagt er að einstaklingar sem nái lengst í lífinu séu stanslaust að fara út fyrir þægindarammann og reyna þannig að bæta sig líka í hlutum sem þeir eru ekki góðir í fyrir. Ef afreksíþróttafólk og virtúósar listalífsins telja sig alltaf geta bætt sig þá getur þú það líka. Batnandi mönnum er jú best að lifa.

Ég æfi mikið og borða hollt. Af hverju ætti ég að taka þátt?

Lestu bókina sem þig langaði alltaf til þess að lesa, lærðu að elda kjötsúpu einsog mamma gerir svo vel, prufaðu að æfa dans í einn mánuð og sjá hvort það er ekki miklu skemmtilegra en þú bjóst við. Möguleikarnir eru fjölmargir fyrir þig til þess að bæta við líf þitt bæði ánægju og gæðum, Meistaramánuðurinn einskorðast alls ekki aðeins við bætta líkamlega heilsu.

Mælið þið með einhverju sérstöku mataræði?

Í gegnum tíðina höfum við mælt með Paleo mataræðinu svokallaða. Í Paleo mataræðinu sleppir maður öllum sykri, hveiti og mjólkurvörum. Í staðin borðar maður nóg af kjöti, fisk, grænmeti, ávöxtum, hnetum og fræjum. Á netinu er hægt að nálgast fjölmargar bækur og greinar um mataræðið og mælum við með að þið kynnið ykkur það betur. Hvort sem þú ferð á Paleo mataræði eða ekki hvetjum við þig til þess að fara út fyrir þægindahringinn í mataræðinu og taka til dæmis út sykraðar matar- og drykkjarvörur.

Hvað með áfengi?

Við mælum með því að fólk sleppi áfengi alfarið. Einsog það getur verið gaman að fá sér í glas með vinunum þá er áfengisneysla líka lífstíll sem auðvelt er að breyta. Það getur verið erfitt að vera sá eini af vinunum sem hættir að drekka og því er tilvalið að menn leggist á eitt í Meistaramánuðinum og prufi þetta í sameiningu. Að detta í það um hverja helgi er alls ekki gott fyrir líkamann og því er tilvalið að nota þennan mánuð til þess að hvíla í það minnsta lifrina örlítið. Það hefur líka stórkostlega góð áhrif á budduna að hætta áfengisneyslu um stund.

Það er árshátíð í vinnunni og ég á afmæli í mánuðinum, er í lagi að svindla þá?

Mundu að það ert þú sem setur reglurnar í þínum Meistaramánuði. Svo lengi sem þú ákveður að það sé einn svindldagur eða jafnvel fleiri í mánuðinum þá ertu þú með fulla stjórn á því að stefna í betri mann, lykilatriðið er að vera heiðarlegur við sjálfan sig. Vittu líka til, kannski langar þig bara ekkert til þess að fá þér sjúss þegar á hólminn er komið. Hugsanlega þráiru einfaldlega að taka næsta dag snemma og með bros á vör?

Ég hef aldrei hreyft mig, hvað á ég að gera?

Byrjaðu hægt og leitaðu góðra ráða hjá fagfólki, kunningjum þínum eða hreinlega með því að kynna þér þetta á netinu. Sumar líkamsræktarstöðvar eru með byrjendanámskeið til dæmis. Það gæti verið tilvalin byrjun. Inn á facebook síðu Meistaramánaðarins munum við setja inn tengla á hlaupa- og sundæfingaplön og jafnvel eitthvað fleira sem gæti hjálpað.

En kostar þetta ekki alltof mikinn pening?

Meistaramánuðurinn á ekki að þurfa að kosta krónu með gati. Í fyrsta skipti sem Meistaramánuðurinn var haldinn þá tóku aðeins sárafátækir háskólanemar þátt og nutu þess að gera ódýru og einföldu hlutina saman. Hvort sem það er að fara út að skokka, læra að hnýta flugur, elda meira með fólkinu sem manni þykir gott að vera með eða að hætta að keyra í vinnuna þá verðu hver og einn að finna sér markmið við sitt hæfi. Það á jafnt við um fjárhag, aldur, staðsetningu og alla aðra hluti sem marka lífstíl þinn.

Ég get ekki vaknað snemma á morgnanna, hvað á ég að gera?

Flestum ef ekki öllum þykir erfitt að vakna þreyttir á morgnana, enda er þetta einn af þessum hlutum sem fólk þarf að venja sig á. Gott ráð til þess að koma sér uppúr morgunmyglunni fljótt og örugglega er að hugsa ekki um það að fara á fætur sem fyrstu athöfn dagsins heldur að vakna alltaf og byrja á því að fá sér stórt vatnsglas. Bæði er líkaminn oft vatnsþurfti eftir 8 tíma svefn og einnig er ágætt að sleppa því hreinlega að snúsa eða að velta deginum fyrir sér og byrja hann tafarlaust á einhverju sem gerir þér gott.

Hverjir standa á bak við Meistaramánuðinn?

Meistaramánuðurinn er hugarfóstur Magnúsar Bergs Magnússonar, Þorsteins Kára Jónssonar og Jökuls Sólberg Auðunssonar. Skipuleggjendur eru hvorki líkamsræktarfrömuðir eða næringarfræðingar en hafa gaman af því að taka áskorunum og reyna bæta sig á öllum sviðum lífsins. Meistaramánuður er skrásett vörumerki.

Magnús Berg Magnússon
@magnusberg
mb@44.is
Þorsteinn Kári Jónsson
@thorsteinnk
torsteinnkari@gmail.com
Jökull Sólberg Auðunsson
@jokull
jokull@solberg.is

Dagatal Meistaramánaðar [PDF]

Hlaupaáætlun Kára Steins [PDF]

Sundáætlun Jakobs Jóhanns

Instagram

Sendu sjónrænt pepp á aðra meistara með því að tagga myndina #meistaram